Саха Ньукулайыгар иһирэхтик

 

Маннык истиҥ-иһирэх ааттаах саха норуотун тапталлаах суруйааччытыгар Н.Г.Золотарев-Николай Якутскайга  аналлаах  альбом – кинигэ сүрэхтэниитэ Белинскэй аатынан куораттааҕы библиотекаҕа, кыраайы үөрэтии салаатыгар буолла.

Кинигэни хомуйан таһаарда Саха Өрөспүүбүлүкэтин култуураҕа туйгуна, Үөһээ Бүлүү улууһун култууратын бочуоттаах кинигэтигэр киирбит Н.Якутскай түмэлин төрүттээччи Копыленко Светлана Даниловна. Альбом-кинигэ быйыл «Көмүөл» кинигэ кыһатыгар 300 эрэ ахсаанынан тахсыбыта. Түмэл баай пуондатын матырыйааллара, хаартыскалара, суруйааччы уруһуйдара, түһэрбит хаартыскалара туһаныллыбыттар. Ааҕааччы киэҥ араҥатыгар анаммыт.  

Дьоро тэрээһин кыттыылаахтара:  бөлөһүөпүйэҕэ билим дуоктара В.Д.Михайлов, Ил Түмэн дьокутаата Шамаев И.И., бэрэпиэссэр В.В.Илларионов, норуот хаһаайыстыбатын үтүөлээх үлэһитэ, Үөһээ Бүлүү, Мэҥэ-Хаҥалас улууһун Ытык киһитэ И.К.Сидоров, «Көмүөл» кинигэ кыһатын салайааччыта Б.И.Попов, Арассыыйа суруналыыстарын сойууһун чилиэнэ, өрөспүүбүлүкэ бэчээтин туйгуна, «Кыһыл көмүс бөрүө» бириэмийэ лауреата Николаева-Мостахова Е.Е., доруобуйа харыстабылын туйгуна, Н.Якутскаай убайын Алексей кыыһа Золотарева Н.А., биллиилээх судаарыстыбаннай уонна бэлитиичэскэй диэйэтэл И.Н.Барахов аймаҕа Барахова Л.И., норуот эмчитэ, алгысчыт Юлия Юрьевна-Намылҕа, СӨ үөрэҕириитин туйгуна, «Дети Саха-Азия» стипендиата, «Кут-сүр» ассоциациятын чилиэнэ, Учууталлар 10 съезтэрин делегата, үлэ бэтэрээнэ Кысылбаикова Т.Д. альбом-кинигэ туһунан тус бэйэлэрин санааларын, саха тапталлаах суруйааччытын айымньыларын кытта хайдах билсиспиттэрин, олохторун суолдьута гыммыттарын, күн бүгүҥҥэ диэри таптаан ааҕылларын сиһилии кэпсээтилэр.   

Альбом-кинигэ таһыгар Николай Якутскай айар үлэ үгэнигэр сылдьар кэмин кэрэһэлиир ССРС норуодунай худуоһунньуга Жуков Н.Н. 1948 с. уруһуйдаабыт бэртириэтэ олус киэргэтэрин тэрээһин кыттылаахтара астыммыттарын бэлиэтээтилэр.  Норуот суруйааччытыгар аналлаах тупсаҕай көстүүлээх кинигэ тахсыбытыттан бука бары олус үөрбүттэрин, долгуйбуттарын эттилэр. Үөһээ Бүлүү улууһун норуодунай суруйааччыларыгар барыларыгар анаан  альбом-кинигэлэр тахсыбыттарын эттилэр.

Ыраах да олордор, үлэлээтэр Николай Якутскай ахтылҕаннаах Харбалааҕар мэлдьитин быыс булла да кэлэ турара. Ол кэлэ сылдьыбыт түгэннэрин туһунан ахтан-санаан аастылар.  Молдавия Тирасполь куоратыгар суруйааччы тиһэх күннэрин туһунан Золотарева Н.А. кэпсээн, тэрээһин кыттыылаахтара уйадыйан ыллыбыт.

Кэрэхсэбиллээх кэпсээн тимэҕэ сөллөн, итии чэйдээх, тымныы быырпахтаах, сылаас алаадьылаах сандалы остуолу тула  кэпсэтиибит салҕанна. Түмүккэ ыалдьыттар саха сиэринэн дьиэлэригэр кытыан эмтээх отонун, лабааларын, туос сыахайдардаах  кэһии тутуурдаах тарҕастылар.

«Кэрэ киһи олоҕун

Кэмсиммэттии олордо.

Саха дэнэр бар дьонун

Санааларын толордо», - диэн П.Одорусов тылларынан дьоро түһүлгэ түмүктэннэ. Түгэнинэн туһанан Белинскэй аатынан куораттааҕы библиотекаҕа, кыраайы үөрэтии салаатын үлэһиттэригэр барҕа махталбытын тиэрдэбит. Инники үлэҕитигэр ситиһиилэри, айымньылаах үлэни, тус олоххутугар дьолу-соргуну баҕарабыт.

Семенова Евдокия Павловна,

И.Барахов аатынан СӨ Судаарыстыбаннаһын түмэлин научнай сотруднига

08.08.2018 с.


           DSCN8180  IMG 0858  

DSCN8147   IMG 0855 

 jhgfh   DSCN8197

Дополнительная информация